Lea flytter på hybel for å gå på vidaregåande. Ho er usynleg, einsam og utan venner.  Ho forelskar seg i Halvor, men korleis skal ein flørte når ein ikkje eingong tør å gå forbi der han sit. Lea tar eit val, ho vert Vilde. Vilde tør. Vilde er kul, modig og morosam.  Ho fargar håret lilla og skulkar skulen. Men Lea vert drege mellom to verdnar. Som Vilde snakkar ho om livet heime og kor fint ho har det. Halvor og dei andre på skulen vert kjende med ei glad jente. Men heime ligg mor i senga og vil ikkje stå opp. Og faren passar garden og går i fjøset, men vert meir og meir dregen i ansiktet. Ingen gir Lea  klare svar på kvifor mora er slik.  Ein gong ho kjem heim har mora stått opp og virvlar rundt i huset som ein tornado. Ho lagar mat og vaskar til langt på natt, og Lea får igjen eit håp om at mora snart skal bli frisk. Men dette skjer ikkje og snart vert livet snudd på hovudet.