Forlaget skriver om denne boka:
I dei bratte fjella langs Storfjorden på Sunnmøre har folk funne plass til ein heim, frå dei eldste tider og mest fram til våre dagar. Dei har reist sine stover på hamrar og hyller, på stader der ingen skulle tru at nokon kunne bu, og der har dei på ufatteleg vis stridd seg gjennom livet. I mangt eit tun gjekk ungane tjora, så dei ikkje skulle falle utfor fjellet, i gjel og flog kleiv geitene seg fast på leiting etter saftig gras, og overalt der det var eit strå å finne, fór kone og mann med rive og ljå. Men der dei trødde sine stigar, med bør på rygg, lurte farane - isete svaberg, snøskred og steinsprang, svimlande stup og ein lunefull kastevindsfjord. Dei levde i samspel med ein gåvmild natur, og dei levde i krig mot nådelause naturkrefter.