Leif Ove Andsnes. I og med musikken er eit nært og levande portrett av ein av dei fremste unge pianistane i verda. Boka fortel historia om Leif Ove Andsnes frå barndomen på Karmøy via viktige læreår fram til han etablerte ein internasjonal karriere, og følgjer livet og arbeidet hans tett gjennom ein sesong. Lesaren blir med på fleire reiser med ein stor, romantisk klaverkonsert, frå heimlandet til San Francisco, Madrid og Moskva, og får innsyn og innlytt bak kulissane under plateslepp i Oslo og på turné i Tyskland. Her er stjernestunder frå kammermusikkfesten i Risør, platestudio og konsertane i Andsnes' eigen serie i Carnegie Hall i New York i 2004/2005. Undervegs deler pianisten ei rad refleksjonar om musikken han spelar og det livet han lever - på godt og vondt.

Astrid Kvalbein (f. 1971) er utdanna songar og pedagog med hovudfag frå Noregs musikkhøgskole. Ho er frilans skribent med brei erfaring frå avis og tidsskrift, mellom anna som kritikar av klassisk musikk for VG i 1999-2004. Dette er den første boka hennar.