Forlaget skriver om denne boka:
Vesle Lasarus er fødd på botnen av samfunnet i Spanias stordomstid på 1500-talet. Frå han er ti-tolv år gammal må han slå seg fram på eiga hand. Spørsmålet er alltid: Korleis skal han unngå å svelta i hel i dag? Han ster seg i teneste hos den eine etter den andre - i alt ni herrar frå ulike lag i det spanske samfunnet.
Slik finn forfattaren av denne boka høve til å spegla eit heilt nasjonalt miljø.. Skildringa får eit intenst liv; lesaren ser alt sjølv, med augo til forteljaren, eit barn som har alt imot seg. Heile tida er det Lasarus som talar, i eit klart og kraftig språk, fullt av folkelege ordtak, ordspel og tvimeiningar. Bak den jordnære realismen i forteljinga ligg ei tragisk livskjensle: Sjølve tilværet er like upåliteleg som falske avlatsbrev og som dygda til Lasarus' kone.
Forfattaren er ukjend. Boka kom ut i Spania i 1554, blir rekna som den første pikareske romanen og er eit hovudverk i den spanske litteraturen. Dette er den første utgåva på norsk, omsett av Sigmund Skard, som og har skrive ei innleiing.