HISTORIENE FRÅ KYSTEN er ulike. Mange handlar om privat rikdom skapt på kort tid. Andre om forfall og avmakt i samfunn der kvotebaronar og konsesjonsadel har skaffa seg arvesølv på billigsal. Nye klasseskilje har oppstått i ei næring der solidariteten ein gong var så viktig. I dag spør folk korleis fisken, ein felles ressurs, så kjapt er blitt spekulasjonsobjekt. Samtidig som vi no for alvor innser kor verdifulle kvotane og konsesjonane er, flyr verdiane bort frå kysten.

Mange har utpeikt Kjell Inge Røkke og tidlegare fiskeriminister Svein Ludvigsen som agentar for privatiseringa. Men også Arbeidarpartiet og Norges Fiskarlag har eir stort ansvar for ein politikk som har samla kvotar og konsesjonar på stadig færre hender. Havlandet har gått på børsen, kysten er utarma samstundes som eksporten frå Fiskeri-Noreg nærmar seg 100 milliardar i året.

Noreg har som mål å vere «verdens fremste sjømatnasjon», men kva slags fiskeristormakt vil vi bli?

GUNNAR GRYTÅS (f. 1949) er forfattar og har arbeidd som journalist i mellom anna Nordlys, Dagens Næringsliv og Fiskeribladet. Han har skrive fleire bøker om fiskeripolitikk og kystkultur. Han har vore engasjert av Norges fiskerihøgskole, Universitetet i Tromsø til å skrive historia om Norges Råfisklag som kom ut i 2013, og er medforfatter på fembandsverket Norges fiskeri- og kysthistorie som kom ut i 2014.